Stani pod striju

Sagradil san ti striju

Ku niki srušit ne more,

Ne poradi zida i melte

Neg poradi čiste, moje ljubavi za te.

Dal san ti rodnu zemlju,

Pušćal ti svodon nebesku ariju,

Temeljni kamen postavil san za te,

Al ni to ti ni dost, patiš za više,

I tako ideš sinko puten u provaliju.

Čekan te godinami i molin se za te,

Dok se ti gostiš za velikin stolon,

Pripravljadu se sirotinjske jaslice za me.

Neš me sinko nać pod velikin boron,

Ja san ti sa vernim pukon na slami, 

Molin se nebu, da makar edanput zajdeš i ti

pod moju striju.

Da srcen osjetiš Božić 

i da rođendansko svetlo u svome srcu, 

za me zapališ.

Pod strijon ti nudin ljubav i materin rubac,

Da ti suze brišen š njin i rane povijan, 

da svojin životon, 

zaludu potrošene dane uz poljubac ti vratin.

Sagradil san striju vu ča prazna zjapi, 

Samo za te, Da se u potribi pod nju skloniš,

Da skupa večaramo kruv i vino,

Ti, da anđelske pismice pivaš

A ja, da blagoslov križa, na te stavin.

Čekan te sinko,

Možda zadnja ura života kuca, 

Prepušći se srcu, odagni sumnje,

Skloni se voga Božića

Makar na ednu noć

Pod moju striju.

4.12.2022.

N.R.